مراحل النضوج النفسي-الجنسي عند سيجموند فرويد

سيجموند فرويد هو أهم عالم نفس على الإطلاق، لأنه أحدث ثورة في مجال التحليل النفسي، بالرغم أنه واجه انتقادات لا حصر لها لأنه ربط كل ما يحدث في سلوكيات الإنسان بالدافع الجنسي أو الطاقة الجنسية libido. لكن أخطر ما قاله فرويد أن هناك دوافع لاواعية لسلوكياتنا لا نعرفها ولا يمكن أن نحددها، فهي تنبع من اللاوعي. وشرح أن سلوكياتنا هي نتاج الصراع بين 3 أجزاء من اللاوعي هي كالتالي:

1- الهو ID	ال Id دي بيمثل الجزء الحيواني فينا.. كل همه أن يشبع الرغبات بشكل فوري دون تفكير في أي تبعات من أي نوع. جزء نزوي غرضه التمتع باللذة.
2- الأنا Ego	بتحاول تنظم الرغبات دي سواء بالتخطيط أو التأجيل أو الكبت.
3- الأنا العليا Super ego	الأنا العليا بتجسد القواعد التربوية للوالدين والقواعد الاجتماعية. تشبه الضمير اللي بيقاوم ال Id.

للمزيد من التوضيح.. الهو دي غبية جدًا.. جزء حيواني لا يفهم أي تعقل أو تروي..أحيانًا بيشبهوه بشيطان واقع فوق دماغك بيقولك اشبع رغباتك..نزواتك.. لا تفكر.. الآن. في المقابل الأنا العليا البعض بيشبهها الضمير أو ملاك واقف على دماغك وبيحاول يقولك متستجبش للهو. لكن البعض بيقول أن الأنا العليا دي كمان غبية جدًا.. ومزعجة جدًا بلا هوادة.. تقعد تقولك إيه ده.. ده شيء مقزز.. أنت لازم تخجل من نفسك.

نيجي لمراحل النضوج النفسي- الجنسي اللي قسمه فرويد إلى 5 مراحل كالتالي، واللي قال إن الفشل في تخطي مرحلة للأخرى بيؤدي إلى تثبيت المرحلة اللي كان فيها fixation:

1-    المرحلة الفموية Oral: الطفل بيحصل على اللذة الجنسية عن طريق الفم من خلال الرضاعة من صدر أمه. أي فطام مبكر سيؤدي إلى مشاكل نفسية خطيرة. قد يعاني الإنسان فيما بعد من مشاكل في الإفراط في الأكل أو التدخين (للمفارقة فرويد نفسه كان بيدخن أكثر من 20 سيجار في اليوم لحد ما جاله سرطان الفم وبالتالي فرويد نفسه كان عنده ”تثبيت فموي“ Oral Fixation). أو ممكن يُفسر الأمر مجازيًا- صح برضو- أن الشخص يكون اعتمادي بشكل مفرط.

2-    المرحلة الشرجية Anal : (من سنة ونص – 3 سنين) ودي فيها بيتعلم فيها الطفل دخول الحمام بنفسه.

3-    المرحلة القضيبية Phallic: (من 3- 7 سنين). مركز المتعة بيتحول إلى الأعضاء التناسلية. وحسب فرويد بيقول في حاجتين بيحصلوا: 1- عقدة أوديب، وأوديب ده في أسطورة يونانية قتل أبوه وأتجوز أمه. فرويد بيقول أن الصبيان كلهم في مرحلة معينة بيحب مامته ولكن باباه بيكون العقبة قدامه.. وبيفكر يخطط أنه يتخلص من باباه.. لكن الطفل بيبقى عارف أن باباه ممكن يكتشف الخطة دي وقد يعاقبه بقطع قضيبه.. وبالتالي يستسلم لباباه ويتوقف عن التفكير في الجنس لعدة سنوات، اللي هي مرحلة الكمون. البنات بيحصلهم حاجة تانية اسمها ”حسد القضيب“ Penis Envy. يعني البنت تحسد الولد لأنه عنده قضيب.. وممكن تتخيل أنها كان عندها قضيب لكن قُطع.. المهم أن البنت بتحاول تعوض ده بمحاولة الهيمنة والسيطة على الرجل. (للمفارقة ناس كتير عارضت الفكرة دي عند فرويد وقالت ده ممكن الرجالة هما اللي يكونوا غيرانين من الأنثى لأن عندها رحم بيوهب الحياة، وبيحاولوا يعوضوا ده بالهيمنة على مجال البيزنز لأن ده بيدلهم نوع من التحكم على حياة الناس بشكل أو بآخر).

4-    مرحلة الكمون Latency: ...

5-    مرحلة الأعضاء التناسلية Genital: ودي المرحلة السوية للبالغين.

فرويد بيقول إن الصراع بين الهو والأنا والأنا العليا مستمر حتى بعد البلوغ، والصراع ده ممكن يظهر في الأحلام وزلات اللسان وأعراض لبعض الحالات المرضية. وبيقول إننا طول الوقت بنحاول نمنع الرغبات الرهيبة بتاعة الهو عن أنها تتسرب للوعي، وبيسمي المحاولات دي بالحيل الدفاعية Defense Mechanisms، وبعضها كالتالي:

1-    التسامي sublimation. أنه لو عندك طاقة جنسية أو عدوانية زيادة ممكن تحولها وتعيد توجيهها في حاجة بناءة، زي الملاكمة مثلا وممارسة الرياضة بشكل عام.   

2-    الإبدال displacement: يعني لو طفل متغاظ من باباه، ممكن يضرب الكلب بتاعه كبديل عن باباه، لأنه ميصحش يضرب باباه.

3-    الإسقاط projection: لو عندي رغبات مش لائقة ومش عجباني في نفسي.. ممكن أسقطها على شخص آخر. مثلاً شخص عنده عقدة نقص يبدأ اتهام الآخرين بأن عندهم نقص.

4-    التبرير rationalization: لما تعمل سلوك غير مقبول وتبدأ تبرره.. ممكن تشتم ابنك وتقول أنك بكده بتربيه.. وهكذا.

5-    النكوص regression: دي عبارة عن انتكاسة للمرحلة الأسبق من النضوج. وده بنشوفه أحيانًا للأطفال اللي بيتعرضوا لصدمات نفسية عنيفة، ممكن يرجعوا يحطوا صباعهم في بوقهم أو يحصل تبول لاإرادي.  

6-    الاستذهان intellectualization : محاولة عقلنة المشكلة لكن المشاعر بتكون مكبوتة غير معالجة مع أنها متأذية.

7-    التنفيس Acting out: حد اتأذي وموجوع فيبدأ يغطي على ده بسلوكيات مدمرة لنفسه أو لآخرين.

8-    الانفصال dissociation: إني أنفصل تماما عن الواقع المؤلم.

9-    الإنكار denial : زي لما حد بيموت ممكن أحد قرايبه ميصدقش.

فرويد بيقول إننا طول الوقت بنستخدم الحيل الدفاعية دي علشا نعمل توازن بين أجزاء اللاوعي الثلاثة.